Starfsfólk Háskóla Íslands í stjórnsýslu- og stoðþjónustu á rétt á að sækja um námsleyfi, samkvæmt gildandi kjarasamningum. Starfsfólk sem ráðið hefur verið til stjórnsýslu- og stoðþjónustu starfa hjá HÍ í a.m.k. eitt ár ávinnur sér tveggja vikna leyfi á hverju ári til að sinna markvissri sí- og endurmenntun sem nýtist í starfi. Starfsfólk í stjórnsýslu- og stoðþjónustu HÍ getur sótt um styttri leyfi strax á fyrsta ári en lengra námsleyfi þegar það hefur starfað hjá HÍ í fjögur ár eða lengur og þannig nýtt uppsafnaðan rétt sinn til lengra samfellds leyfis. Uppsafnaður réttur getur þó aldrei orðið meiri en 6 mánuðir í samfelldu námsleyfi.
Umsóknarfrestir um lengri námsleyfi eru tveir á ári:
- 15. apríl fyrir næsta haustmisseri (1. júlí-31. desember) og
- 15. september fyrir næsta vormisseri (1. janúar-30. júní).
Starfsfólk getur sótt um styttri námsleyfi (allt að 2 vikur á ári) beint til síns næsta yfirmanns.
Umsóknarferlið
- Gott er að byrja á því að athuga hver uppsafnaður réttur er, það er gert með því að senda tölvupóst á mannaudur@hi.is og óska eftir upplýsingum.
- Ákveða hvaða nám/námskeið skal stunda í námsleyfinu.
- Ræða við næsta yfirmann um tilhögun námsleyfis. Samþykki yfirmanns er forsenda þess að hægt sé að senda inn formlega umsókn. Næsti yfirmaður þarf jafnframt að skrifa umsögn sem fylgja þarf umsókninni.
- Umsókn, ásamt umsögn yfirmanns er send á netfangið fraedsla@hi.is
- Miðað er við að umsækjandi sé kominn með svar eigi síðar en fjórum vikum eftir að umsóknarfrestur rennur út.
Umsóknareyðublað og ítarlegri upplýsingar finnur þú á síðu Mannauðs í Uglu
Mat á umsókn
Þegar metið er hvort leyfa eigi námsleyfi hverju sinni er fyrst og fremst tekið mið af því hvernig námið nýtist starfsfólki í því starfi sem það gegnir hjá HÍ í dag.
Dagpeningar
Starfsfólk sem fer utan í lengri námsleyfi getur sótt um þjálfunardagpeninga fyrir öðrum kostnaði en gistingu eins og kveðið er á um í reglum ferðakostnaðarnefndar ríkisstarfsmanna. Hámarksgreiðsla þjálfunardagpeninga er 400.000kr og verður aðeins greidd að því gefnum að um sé að ræða viðurkennt háskólanám sem lýkur með viðurkenndri prófgráðu og ekki sé hægt að stunda námið á Íslandi. Þjálfunardagpeningar eru eingöngu ætlaðir fyrir lengri námsleyfi, sem vara í fullar 4 vikur eða lengur. Annar hugsanlegur kostnaður við námsleyfi erlendis, eins og t.a.m. ferða- og gistikostnaður er ekki greiddur.
Lokaskýrsla
Að námsleyfi loknu þarftu að skila skýrslu til yfirmanns þar sem greint er frá framvindu námsins, hvernig leyfið var nýtt, hvort námið nýtist í starfi viðkomandi og hvort framhald sé fyrirhugað á námi eða störfum sem tengjast náminu. Mælst er til þess að starfsfólk haldi kynningu fyrir samstarfsfólk um námið.