Námsmenn með börn

Uppfærð Júní 26, 2026 09:28

Stór hluti nemenda við háskólann eru einnig foreldrar og þurfa því að samræma nám og fjölskyldulíf. Hér má finna hagnýtar upplýsingar um réttindi tengd fæðingarorlofi, leikskólamál, húsnæðismál, Menntasjóð námsmanna og annað sem getur skipt máli fyrir nemendur með börn.

Fæðingarstyrkur

Nemendur sem eiga von á barni eiga rétt á fæðingarstyrk úr Fæðingarorlofssjóði. Inni á vef island.is má finna, auk upplýsinga um fæðingarstyrk, ítarlegar upplýsingar um réttindi nemenda með börn.

Leikskólar FS

Félagsstofnun stúdenta rekur tvo leikskóla sem báðir eru staðsettir í stúdentagarðahverfinu á Eggertsgötu. A.m.k. annað foreldri/forráðamaður þarf að stunda nám við HÍ til að fá pláss og er hægt að lesa sér til um reglur og annað varðandi leikskólana á heimasíðu FS.

Sum sveitarfélög veita nemendum afslátt á leikskólagjöldum gegn staðfestingu á skólavist. Hægt er að nálgast staðfestingu á skólavist í Uglan mín→ Vottorð og námsferilsyfirlit.

Stúdentagarðar

Nemendur með börn geta sótt um að leigja 2-4 herbergja íbúðir hjá Stúdentagörðum og ef báðir foreldrar eru í námi við HÍ njóta þær fjölskyldur forgangs. Nánari upplýsingar eru í úthlutunarreglum Stúdentagarða.

Allir leigjendur á Stúdentagörðum eiga rétt á því að sækja um húsnæðisbætur hjá Húsnæðis- og mannvirkjastofnun.

Algengar spurningar

Hvað á ég að gera ef barnið mitt er veikt þegar ég á að fara í próf

Það gilda sömu reglur um veikindi barns og ef nemandi er sjálfur veikur. Sjá Sjúkrapróf.

Hvað ef ég er með barn á brjósti í prófi

Foreldrar með ungbarn á brjósti geta sótt um úrræði sem tengjast brjóstagjöf í prófum. Til að fá slíkt úrræði þarf að hafa samband við úrræðateymi nemendaráðgjafar.

Er einhver aðstaða fyrir börn í HÍ?

Í Suðurálmu Sögu (S-256) er að finna Hreiðrið, sem er næðisrými fyrir foreldra með börn.

Skiptiborð má finna á nokkrum salernum:

á kvennasalerni á 1.hæð á Háskólatorgi
á salerni á 2.hæð á Háskólatorgi
í Eirberg á salerni í kjallara
í Öskju á salerni fyrir fatlaða fyrir miðju á 1.hæð
í Veröld Vigdísar á salerni fyrir fatlaða á 1. hæð&;

Einnig eru barnastólar á Háskólatorgi.

Má koma með börn í tíma?

Sumir kennarar leyfa að foreldrar komi með nýfædd börn í tíma, en engar formlegar reglur eru til um það og því mikilvægt að ræða það við kennara fyrirfram.