Nemendur þurfa að skrá sig í lokaverkefni eins og önnur námskeið. Sjá Skráning í námskeið og próf
Reglur varðandi lokaverkefni geta verið mismunandi eftir fræðasviðum og deildum og því best að leita þangað fyrir ítarlegar upplýsingar. Nemendur bera ábyrgð á að kynna sér reglur og tímamörk deildar um skil á ritgerð eða lokaverkefni.
Hafðu samband við nemendaþjónustu á þínu sviði til að fá leiðbeiningar um val á leiðbeinanda.
Nemendaráðgjöf HÍ býður upp á námskeið fyrir nemendur í grunnnámi sem eru að hefja vinnu við lokaverkefni. Upplýsingar um námskeiðin koma inn á þessa síðu þegar þær liggja fyrir.
Á vefnum honnun.hi.is má nálgast sniðmát fyrir kápur bakkalár- og meistararitgerða á öllum fræðasviðum skólans. Gætið að því að vista skjalið í tölvunni áður en það er opnað. Skjalið virkar ekki ef það er opnað í vafra heldur þarf að opna það í Acrobat Reader forritinu.
Á vef fræðasviðanna í Uglu er að finna sniðmát fyrir frágang lokaverkefna og ritgerða.
Háskóli Íslands notar forritið Turnitin til varnar ritstuldi. Í Turnitin er hægt að hlaða inn skjali með texta, t.d. lokaverkefni nemanda. Forritið ber texta skjalsins saman við mikið safn heimilda. Niðurstaðan sýnir hvort rétt er farið með heimildir og tilvísanir í þær, eða hvort um er að ræða óeðlilega mikla samsvörun við verk annarra höfunda.
Leiðbeiningar um notkun forritsins má nálgast í kennsluskrá HÍ og í gegnum vefinn turnitin.hi.is.
Til að ljúka skilum þarftu að:
- Skila rafrænu eintaki af lokaritgerð í Skemman.is ásamt yfirlýsingu um meðferð lokaverkefnis .
- Skila rafrænu eintaki af lokaritgerð í skilahólf lokaverkefnisins á Canvas.
- Þegar staðfesting berst frá Skemmunni í tölvupósti skaltu einnig skila henni í skilahólf á Canvas.
Athugaðu að það geta liðið 1–2 dagar frá því að ritgerð er send í Skemmuna þar til staðfesting berst. Tekið er tillit til þess í skilafresti á Canvas.
Nánari leiðbeiningar um skil í Skemmuna má finna á Leiðarvísir Skemmunnar .