Brautskráning og brautskráningarskírteini

Skráning í brautskráningu

Nemandi sem ætlar að brautskrást þarf að skrá brautskráningarmánuð tímanlega fyrir áætlaða brautskráningu. Það er hægt að gera í Uglu þegar opið er fyrir endurskoðun námskeiðaskráninga í upphafi haust- og vormisseris. Það þarf alltaf að skrá sig í brautskráningu óháð því hvort nemandi ætlar að vera viðstaddur athöfnina.

Þú þarft að kynna þér reglur hjá þinni deild um skil á ritgerð/lokaverkefni og staðfesta áform um brautskráningu.

Ef þú ert ekki skráð/-ur í brautskráningu og/eða hefur ekki staðfest við deildina þína í lok misseris að þú ætlir að brautskrást er litið svo á að þú ætlir ekki að brautskrást.

Ítarlegri upplýsingar um brautskráningu má finna í kennsluskrá.

Athöfn

Háskóli Íslands brautskráir kandídata þrisvar á ári, í febrúar, júní og október. Nákvæmari dagsetningar má finna í Kennslualmanaki Háskóla Íslands.

Engin formleg brautskráningarathöfn er á dagskrá í október en brautskráningarkandídötum býðst að sækja prófskírteini sitt í Hátíðasal Aðalbyggingar HÍ. Tímasetning er auglýst hverju sinni.

Skírteini/gögn afhent við brautskráningu

Þegar þú brautskráist frá Háskóla Íslands færðu afhent:

• Brautskráningarskírteini ásamt enskri þýðingu.
• Námsferilsyfirlit á íslensku og ensku með upplýsingum um brautskráningu. Þar eru listuð námskeiðin þín, einkunnir og hvenær þú laukst hverju námskeiði fyrir sig. Einnig eru þar upplýsingar um heiti prófgráðu, dagsetning brautskráningar, meðaleinkunn og heildarfjölda eininga.
• Skírteinisviðauki á íslensku og ensku. Hann inniheldur ítarlegri upplýsingar um gráðuna og menntastofnunina.

Ef kandídat er fjarverandi við brautskráningu getur hann sótt brautskráningarskírteinið á Þjónustuborðið Háskólatorgi gegn framvísun persónuskilríkja. Skírteinin eru geymd á Þjónustuborðinu í tvö ár og fara eftir það á Skjalasafn Háskólans.

Nemendur sem ljúka diplómagráðu fá skírteini afhent á Þjónustuborðinu Háskólatorgi. 

Ef nemendur sem búa utan höfuðborgarsvæðisins eru fjarverandi við brautskráningarathöfnina, og sjá sér ekki fært að koma á Þjónustuborðið, er hægt að óska eftir að fá skírteinið sent á eigin kostnað.

Háskóli Íslands ber ekki ábyrgð á skírteininu eftir að það hefur verið afhent póstþjónustu.

Beiðni um sendingu

Afrit af skírteinum er einungis gefin út á pappír eftir brautskráningu. Sjá frekar Staðfesting á brautskráningu.

Örnám

Nemendur sem ljúka örnámi brautskrást ekki heldur fá vottorð og vottorðsviðauka sem birtist eingöngu á mínum síðum á island.is.